En MaOs deseñamos diversos paseos literarios e culturais. Tres deses paseos creámolos por encarga da Concellaría de Acción Cultural do Concello de Santiago e guiámolos durante o verán de 2016 e na primavera de 2017:

Paseo sobre as Irmandades da Fala en Compostela. Seguimos as pegadas das Irmandades da Fala en Compostela, para coñecer aos seus e súas principais protagonistas así como ter unha visión xeral do que foi e supuxo este movemento. O paseo parte do antigo quiosco da Alameda de Compostela e percorre rúas da zona vella que coñecemos e transitamos acotío. O punto de encontro foi o quiosco da Alameda, no cal se encontra parte da exposición das Irmandades da Fala (podes visitala aquí). Este paseo realizouse tres veces, dúas pola tarde (ás 19:30) e unha en horario nocturno (22h). Este paseo realizouse tamén en francés e inglés para alumnado da Escola Oficial de Idiomas.

Compostela (d)escrita. Paseo pola Compostela literaria. Pomos o foco na relación entre literatura e universidade desde “A Casa da Troia” até finais do século XX. O paseo quere ser un conxunto de pistas que nos axuden a entrever novos recunchos posíbeis do mapa literario da cidade. O punto de encontro foi a Praza de Mazarelos, ao lado da estatua. O paseo nocturno diferenciarase dos de tarde en dúas das paradas. Este paseo realizouse tres veces, dúas pola tarde (ás 19:30) e unha en horario nocturne (22h). Este paseo realizouse tamén en francés e inglés para alumnado da Escola Oficial de Idiomas.

Carlos Casares e Compostela. Paseo dedicado a Carlos Casares, a quen se lle dedicou o Día das Letras Galegas no ano 2017, pondo o foco na relación da vida e a obra do autor coa cidade de Compostela. Este paseo realizouse seis veces ao longo da semana do 17 de maio.

Ofrecemos todos estes paseos en galego, castelán, inglés, francés, portugués e catalán